JUHUDI: Rais Magufuli akutana na Dangote

Mfanyabiashara maarufu barani Afrika Aliko Dangote.

DAR ES SALAAM:

Hatimaye mgogoro uliosababisha kusimamishwa kwa uzalishaji katika kiwanda cha saruji cha Dangote, kilichopo mkoani Mtwara , inaelekea umekwisha baada ya tajiri bilionea Mnigeria Aliko Dangote kukutana na Rais John Pombe Magufuli hapo jana jijini Dar es Salaam.

Katika mazungumzo hayo, Rais Magufuli amemhakikishia mfanyabiashara huyo kuwa serikali ya Tanzania itaendelea kuweka mazingira mazuri kwa wawekezaji wote nchini kwa lengo la kuimarisha sekta ya viwanda nchini humo.

Rais wa Jamhuri ya Muungano wa Tanzania Dkt. John Pombe Magufuli akifurahia jambo na mmiliki wa Kiwanda cha Saruji cha Dangote kilichopo Mtwara Alhaji Aliko.

HABARI KWA UNDANI:   Baada ya mazungumzo hayo  Rais Magufuli na mwekezaji huyo walijitokeza kwa waandishi wa habari katika viwanja vya Ikulu mjini Dar es salaam na wote kuhakikisha kuwa matatizo yote yaliyosababisha kusimama kwa uzalishaji yameshughulikiwa.

Rais Magufuli alisema watu aliowaita “walipiga dili” ndio walioingilia shughuli za biashara na kusababisha kukwama kwa uzalishaji. Dangote alihakikisha kuwa bado ana nia ya dhati ya kuwekeza Tanzania na kwamba anataka kununua mali zote ghafi za kiwanda hicho ndani ya Tanzania.

Pia amekanusha uvumi unaondelea kuhusu kiwanda cha kuzalisha Saruji cha Dangote akisema kuwa hakukuwepo na tatizo lolote ila watu waliotaka kujinufaisha binafsi kupitia mradi huo

Amemtaka Dangote kununua gesi moja kwa moja kutoka TPDC ambacho ni chombo cha serikali badala ya kutumia watu ambao wamekuwa na nia ya kutengeneza faida tu.

Mvutano kati ya serikali ya  na kampuni ya Dangote ilijitokeza mwanzoni mwa mwezi Disemba baada ya kampuni hiyo kutangaza kusimamisha kwa muda uzalishaji wa saruji katika kiwanda hicho chenye thamani ya dola za Marekani milioni 600, ambacho tangu kuzinduliwa kwake bei ya saruji nchini imeshuka kwa zaidi ya asilimia 30.

Kiwanda cha Dangote ambacho kina uwekezaji mkubwa katika sekta ya uzalishaji saruji kuliko viwanda vingine vyote vilivyopo Afrika Mashariki kina uwezo wa kuzalisha saruji takriban tani milioni tatu kwa mwaka na kimetoa ajira ya moja kwa moja kwa zaidi ya watu 1,000 mkoani Mtwara.