AJIRA KWENYE MRADI: Ndalichako azindua mradi wa billioni 200.

ARUSHA.

Waziri wa Elimu ,Mafunzo na Ufundi Profesa Joyce Ndalichako akiwasili katika Chuo cha Sayansi na Teknolojia cha Nelson Mandela ambapo amezindua mradi wa Vituo vya Umahiri utafiti wa kilimo na Magonjwa ya binadamu pamoja na mradi wa kuongeza ujuzi kwa kazi za uzalishaji zinazoleta tija uliofadhiliwa na Benki ya Dunia.

PHOTO: Waziri wa Elimu, Sayansi, Teknolojia na Ufundi Profesa, Joyce Ndalichako (wa pili kushoto) akiwasili katika Chuo cha Sayansi na Teknolojia cha Nelson Mandela, kulia kwake ni mkuu wa mkoa wa Arusha Mrisho Gambo.

PHOTO: Waziri wa elimu, sayansi, teknolojia na ufundi profesa, Joyce Ndalichako akikata utepe kuashiria kuzindua mradi kituo cha utafiti, kushoto kwake ni mkurugenzi wa Benki ya dunia kwa ukanda wa Maziwa makuu.

PHOTO: Waziri wa elimu, sayansi, teknolojia na ufundi Profesa, Joyce Ndalichako (wa pili kushoto) akisikiliza maelezo juu ya uendeshaji na namna mradi utakavyoendeshwa.

HABARI KWA UNDANI. 

Benki ya Dunia imetoa kiasi cha fedha cha Dola Milioni 120 ambazo ni sawa na Bilioni 200 za kitanzania ili kuwezesha miradi ya elimu na ujuzi kwa ajili ya kazi zinazoleta uzalishaji wenye tija pamoja na vituo viwili vya umahiri vya kikanda.

Akizungumza katika uzinduzi wa Miradi hiyo Waziri wa Elimu Profesa Joyce Ndalichako amesema kuwa miradi hiyo itasaidia kuongeza watu wenye ujuzi wa kati ambao watafanya kazi katika sekta za kilimo, Utalii, Ujenzi, nishati na madini.

"huu ni moja ya miradi iliyofadhiliwa pamoja na vituo vingine vya umahiri katika masuala ya utafiti wa kilimo na magonjwa ya binadamu ikiwemo viwili vinavyomilikiwa na Chuo kikuu cha Nelson Mandela pamoja na vituo vingine viwili vilivyopo katika Chuo cha Kilimo cha Sokoine University of Agriculture" alisema Prof. Ndalichako.

Mkurugenzi wa Benki ya Dunia kwa nchi za Tanzania,Malawi, Burundi na Somalia Bella Birds alisemaa kuwa uboreshwaji wa rasilimali watu kwa kuongeza ujuzi uliokosekana utasaidia taifa kufikia malengo yake ya kufikia uchumi wa viwanda.

"inakadiriwa kuwa Vijana milioni 1 huitimu katika vyuo mbalimbali na kuingia katika soko la ajira kila mwaka hivyo inatarajiwa kuwa nafasi za ajira kwa vijana hao zitatengenezwa na sekta binafsi iwapo zitashirikiana vyema na serikali husika" alisema Bella Birds.

Wakati huo huo makamu wa Chuo cha Sayansi na Teknolojia cha Nelson Mandela Karoli Njau alisema kuwa mradi huo utasimamiwa kwa makini ili kuhakikisha kuwa malengo yanafikiwa hususan katika vituo vya umahiri pamoja na mradi wa ujuzi.

Mkurugenzi Mtendaji wa Taasisi ya Sekta Binafsi Tanzania (TPSF) Godfrey Simbeye amesema kuwa kulikua na upungufu mkubwa wa watu wenye ujuzi nchini kutokukidhi mahitaji ya soko la ajira hivyo kulazimu waajiri kuajiri watu kutoka nje jambo linalogharimu fedha nyingi hivyo mradi huo utasaidia vijana 30,000 kupata ujuzi utakaokidhi mahitaji ya soko la ajira.